«Медеу» мұз айдынында өткен салтанатты шараға Алматы қаласының әкімі Дархан Сатыбалды, қоғам және мәдениет қайраткерлері, мәслихат депутаттары, Қоғамдық кеңес мүшелері, үкіметтік емес және жастар ұйымдарының өкілдері, танымал спортшылар, сондай-ақ қала тұрғындары мен қонақтар қатысты, деп хабарлайды kznews.kz.
Көк байрақты көтеру рәсімінде дәстүр бойынша әскери-оркестрдің сүйемелдеуімен Мемлекеттік Әнұран орындалды. Ту ілінген тұғырдың биіктігі 40 метрді, ал көлемі 7x14 метрді құрады.
Еске салсақ, Республика күні қарсаңында қала әкімі Дархан Сатыбалды Қазақстан Президенті Қасым-Жомарт Тоқаев атынан мемлекеттік наградаларды табыс етті. Марапат иелері елдің әлеуметтік-экономикалық және мәдени дамуына елеулі үлес қосқан алматылықтар болды. Сонымен қатар, Республика сарайында мерекелік концерт ұйымдастырылды.
Бүгін Алматыда әртүрлі іс-шаралар өтіп жатыр. Республика сарайының алдында «Атамекен» атты патриоттық акция, Жібек жолы көшесінде қолөнершілер мен суретшілер жәрмеңкесі, экологиялық бастамалар және басқа да мәдени шаралар ұйымдастырылды.
Сондай-ақ, сағат 18:00-де Республика күніне орай «Көктөбе» телемұнарасы мерекелік сәулеттік жарықпен безендіріледі.
