20 қаңтар, 2026
Шешенстан басшысы Рамзан Қадыровтың екі ұлы – Али мен Абдуллахтың атына Грозныйдың орталығындағы элиталы жылжымайтын мүлік рәсімделгені айтылды. «МО» зерттеген Росреестр деректерінің тарап кеткен мәліметіне сүйенсек, олардың «сарайлары» Қадыровтың Грозныйдағы резиденциясынан шамамен 300 метр жерде орналасқан, деп хабарлайды kznews.kz.
19 жастағы Али Қадыровтың атына 4,5 мың шаршы метр жер телімі және 1,3 мың шаршы метрлік үй тіркелген. Мәлімет бойынша, ол бұл особнякты 2024 жылдың ақпанында Адам Касумов есімді адамнан сатып алған. «МО» Касумовтың бизнесі жоқ екенін, соған қарамастан қымбат мүлікті сатып алып, кейін қайта сатқанын атап өтеді. Жергілікті бағаларды негізге алғанда, Алидің мүлкі кем дегенде 500 млн рубль тұруы мүмкін.
Али Қадыров «Ахмат» атты жекпе-жек клубын басқарады. 2024 жылдың тамызында оған «дене шынықтыру мен спортты дамытуға қосқан үлесі, кең танылған әрі қоғам тарапынан мойындалған қызметі үшін» Шешен Республикасының «Ерен еңбегі үшін» медалі берілгені айтылады. Бұдан екі ай бұрын ол Путинмен кездескен, сол кезде Қадыровтың ұлы небәрі 17 жаста болған.
«МО»-ның бұрынғы жазбасында Алидің әкесіне тиесілі Airbus ACJ319 ұшағымен (борт нөмірі RA-73417) ұшатыны айтылған. Сол ұшақпен ол Меккеге қажылыққа барғанын жариялап, Instagram-да сурет салған. Кадрда оның кеудесінде Louis Vuitton сөмкесі көрінген.
Алидің дәл іргесінде оның інісі Абдуллах Қадыров тұрады делінеді. Бұл баланың атына 4 мың шаршы метр жер телімі және 2 мың шаршы метрлік үй рәсімделген. Ең қызығы, ол осы «сарайдың» иесі болған кезде жасы небәрі 7-де ғана болған (қазір Абдуллах 9 жаста).
Росреестр деректеріндегі тарап кеткен мәліметке сенсек, бұл жылжымайтын мүлікті оған әкесі – Рамзан Қадыров сыйға тартқан. Айтуларынша, алдымен Қадыров аталған жерді жалға алған, кейін оны ұлына қайта рәсімдеген, ал ол 2023 жылы телімді жекешелендіріп алған. Әрине, 7 жастағы баланың мұндай мүлікті сатып алатындай қаражаты болмағаны түсінікті. Жергілікті бағаларға сүйенгенде, оның құнын шамамен 800 млн рубль деп бағалауға болады.
Абдуллах жасы кіші болғандықтан саясатта көзге түсе қоймаған. Дегенмен оның туған күніне орай Грозный мэриясының сайтында құттықтау жарияланғаны айтылады. 2025 жылғы құттықтауда «Абдуллах жігерлі, батыл, жасына сай емес зерек, мектепте жақсы оқиды; бауырлары мен әпкелері сияқты Құран оқиды, өз халқының тарихы мен дәстүріне қызығады» деген мазмұнда мәтін берілген.
Бауырлардың маңайына Адам Қадыров та қоныстанғаны сөз болады. Ол 16 қаңтарда жол апатына түскені айтылған. Оның атына құны 750 млн рубль деп бағаланатын ақ түсті, 4 қабатты особняк тіркелген. Мәлімет бойынша, әкесінің резиденциясына көрініс ашу үшін Адамның сарайының алдындағы бір үйді сүріп тастаған.
«МО» анықтаған дерекке сүйенсек, коллаждағы төменгі суретте көрсетілген сол үйде бұған дейін Шешенстан басшысының екінші әйелі Фатима Хазуева тұрған. Қадыров Хазуевамен 2006 жылдың көктемінде Шешенстан тарихындағы жалғыз сұлулық байқауынан кейін танысқаны айтылады. Ал «Проект» мәліметінше, Хазуева 14 жасында Қадыровтан жүкті болып, оған бірнеше бала туған.
