17 қаңтар, 2026
Niyso телеграм-арнасы мен «Кавказ.Реалии» басылымының дерегінше, Шешенстан басшысы Рамзан Қадыровтың 18 жастағы ұлы Адам Қадыров Грозный қаласында жол апатына түсіп, ауыр хәлде ауруханаға жеткізілген, деп хабарлайды kznews.kz.
Ақпарат көздерінің мәліметінше, Адам Қадыров ес-түссіз күйде Грозныйдағы республикалық ауруханада жатыр, жағдайы ауыр деп бағалануда.
Niyso дерегіне сәйкес, оған реанимациялық көмек көрсетіліп, Мәскеуге тасымалдауға дайындық жүргізіліп жатыр. Алайда Шешенстан билігі бұл ақпаратқа қатысты әзірге ресми мәлімдеме жасаған жоқ.
Дереккөздер жол апаты кезінде кортеждің жоғары жылдамдықпен қозғалғанын, бірнеше көліктің соқтығысқанын хабарлайды. Апат салдарынан бірнеше адамның жарақат алғаны айтылады. Оқиғадан кейін Грозный қаласының кейбір көшелері уақытша жабылған.
Адам Қадыров — Рамзан Қадыровтың көпшілікке танымал ұлдарының бірі. 2023 жылдың қыркүйегінде Рамзан Қадыров әлеуметтік желіде оның тергеу изоляторында Никита Журавельді ұрып жатқан видеосын жариялаған еді. Осыдан кейін БАҚ мәліметінше, Адам Қадыровқа бірқатар марапаттар табысталып, Шешенстанда түрлі қызметтерге тағайындалған.
