9 қараша, 2025
Танымал әнші Қарақат Әбілдина әлеуметтік желіде өзіне және жұбайы Қыдырәлі Болмановқа қатысты жасанды түрде жасалған жалған видеолардың таралуына наразылық білдірді,, деп хабарлайды kznews.kz.
Бұған дейін желіде Қыдырәліге ұқсайтын ер адам мен бір қыздың бірге тұрған видеосы тарап, көпшілік талқысына түскен еді. Кейін әнші бұл материалдың жалған екенін айтып, өз парақшасында түсініктеме қалдырды. Осы оқиғаға байланысты Қарақат Әбілдина да пікір білдіріп, жасанды интеллекттің дұрыс қолданылмауы қоғамға қауіп төндіретінін айтты.
«Технология дамыды, бірақ оны қолдануда тәрбие жетіспейді. Соңғы күндері біздің атымызға қатысты жасанды интеллектпен жасалған жалған видеолар тарап кетті. Мұндай контент адамның абыройына, отбасына зиян келтіреді. Бұған құқықтық деңгейде тосқауыл қажет», – деп жазды ол.
Әнші жалған ақпаратқа сенбеуге және кез келген видеоны тексеріп барып қабылдауға шақырды.
