Бүгін, 15:22
Жалған ақпаратқа қарсы іс-қимыл орталығы кезекті фейктер толқыны туралы ескертті, деп хабарлайды kznews.kz.
Жалған ақпаратқа қарсы іс-қимыл орталығы Telegram-дағы арнасында әлеуметтік желілерде мемлекеттік органдар мен ҚР Орталық сайлау комиссиясы бірінші басшыларының бейнелерін пайдалана отырып жасалған жалған мәлімдемелер, баспасөз хабарламалары, фото және видеоматериалдардың мақсатты түрде таратылып жатқанын мәлім етті.
Осыған байланысты орталық сайлау процесіне қатысты барлық ресми ақпарат Қазақстан Республикасы Орталық сайлау комиссиясының ресми ресурстарында ғана жарияланатынын еске салды.
"Орталық азаматтарды шынайылығы ресми дереккөздер арқылы расталмаған хабарламаларды, аудио және бейнежазбаларды қайта жібермеуге және жарияламауға шақырады. Құқыққа қайшы контентті жасауға және таратуға қатысы бар тұлғалар анықталып, Қазақстан Республикасының заңнамасына сәйкес жауапкершілікке тартылады", - делінген хабарламада.
Бұған дейін орталық қаскүнемдер кейіннен жалған ақпарат тарату үшін пайдалануы мүмкін жария тұлғалардың бейнелері бар фото және бейнематериалдардың үлкен көлемін жинақтап жатқанын ескерткен еді.
"Жалған ақпарат таратудың анықталған фактілері бойынша Бас прокуратура тергеп-тексеру жүргізуде. Жалған материалдарды жасау және таратудың барлық жағдайын құқық қорғау органдары тіркеп жатыр", - делінген хабарламада.
