Алматы облысында қызметтік міндетін атқарып бара жатқан құтқарушы жол апатынан қаза тапты, деп хабарлайды kznews.kz.
Төтенше жағдайлар департаментіне тиесілі көлік аударылып, жүргізуші оқиға орнында көз жұмған.
Қайғылы оқиға 12 желтоқсанда Алматы–Қапшағай–Бақанас тас жолында болған. УАЗ маркалы қызметтік автокөлікте екі қызметкер отырған. Тайғақ жолда көлік басқарудан шығып, аударылған. Байланыс болмағандықтан, аман қалған жолаушы көмек шақыру үшін жаяу кеткен. Дәрігерлер келген кезде жүргізушінің қайтыс болғаны анықталды.
Марқұм — Фархад Аманбаев. Оның туыстары апатқа техниканың жарамсыз күйі себеп болды деп есептейді. Айтуларынша, көлік ескі әрі қолдан жиналған, тіпті есептен шығарылған жедел жәрдем көлігінің бөлшектері пайдаланылған.
Жақындары ведомство басшылығын қызметкерлерді тозығы жеткен техникамен жолға шығарды деп айыптап отыр. Дәлел ретінде олар апатқа дейін түсірілген бейнежазбалар мен құтқарушылардың көлікті өз қаржыларына жөндегенін көрсететін материалдарды ұсынды.
