Бүгін, 20:37
18 шілдеде Қазақстанның барлық мемлекеттік онкологиялық орталығында саркоманы ерте анықтауға арналған Ашық есік күні өтеді. Телеграмдағы "НЕХабар" арнасының жазғанындай бұл күні тұрғындар онкологтың қабылдауына жолдамасыз және алдын ала жазылмай-ақ тегін бара алады, деп хабарлайды kznews.kz.
Акция аясында кез келген азамат онколог дәрігердің тегін кеңесін алып, жолдамасыз және алдын ала жазылмай-ақ тексеріле алады. Қажет болған жағдайда алғашқы диагностикалық тексеруден де өтеді.
Дәрігерлердің айтуынша, Қазақстанда жыл сайын саркоманың 150-ден астам жаңа жағдайы тіркеледі. Қазір бұл диагнозбен 1700-ден астам адам диспансерлік есепте тұр. Мамандар сүйектегі ұзаққа созылған ауырсыну, денедегі түйін немесе ісік тәрізді түзілістер пайда болған жағдайда дәрігерге дер кезінде қаралуға кеңес береді.
Ашық есік күні аясында тұрғындар:
онкологтардың тегін кеңесін алады;
онкологиялық аурулардың алдын алу бойынша ұсыныстарға ие болады;
көрсетілім болған жағдайда алғашқы тексеруден өтеді;
қажетті диагностикадан өте алады.
Қабылдауға бару үшін өзіңізбен бірге жеке куәлігіңізді алып бару қажет.
