Air Astana әуе компаниясы 15 шілдеден бастап Дубай бағытына тұрақты рейстерді қайта іске қосуды жоспарлап отыр, деп хабарлайды kznews.kz.
«Air Astana 15 шілдеден бастап Алматы – Дубай – Алматы және Астана – Дубай – Астана тұрақты рейстерін қалпына келтіруді жоспарлап отыр», – делінген әуе компаниясының ресми хабарламасында.
Сонымен қатар компания аймақтағы ахуалға байланысты ұшу кестесіне өзгерістер енгізілуі мүмкін екенін ескертті. Мұндай жағдайда жолаушыларға қосымша ақпарат берілетіні айтылды.
Еске салайық, осыдан екі күн бұрын Астанадан Дубайға бағыт алған Air Astana ұшағы діттеген жеріне жете алмай, кері әуежайға оралған болатын. Бұған Таяу Шығыстағы жағдайдың шиеленісуі себеп болған. Осыған байланысты әуе компаниясы Дубай бағыты бойынша рейстерді уақытша тоқтатқан еді.