Бүгін, 12:08
Парламент бірінші оқылымда «Қазақстан Президенті туралы» Конституциялық заң жобасын қарады. Құжатты Әділет министрі Ерлан Сәрсембаев таныстырды, деп хабарлайды kznews.kz.
Заң жобасы 15 наурызда қабылданған Конституцияны іске асыру аясында әзірленген. Негізгі жаңашылдықтардың бірі – мемлекет басшысының ұсынуымен және Құрылтайдың келісімімен тағайындалатын вице-президент лауазымын енгізу.
Министрдің айтуынша, вице-президенттің өкілеттіктері президент актілері арқылы нақтыланады. Бұл мемлекеттік басқару міндеттеріне бейімделуге мүмкіндік береді. Сонымен қатар, оның қызметін Президент әкімшілігі қамтамасыз етеді.
Вице-президент президент тапсырмасымен Құрылтаймен, Үкіметпен және өзге де мемлекеттік органдармен өзара іс-қимылда мемлекет басшысының атынан өкілдік етеді. Президент өкілеттігі мерзімінен бұрын тоқтатылған жағдайда, оның міндеттері вице-президентке өтеді.
Заң жобасында президенттің жеті жылдық бір реттік өкілеттік мерзімі, саяси партияға мүшелік етпеуі және жақын туыстарының жоғары лауазымдарға тағайындалуына қатысты шектеулер сақталған. Сонымен бірге, президентке:
«Қазақстан Халық Кеңесінің» құрамын бекіту;
адам құқықтары жөніндегі уәкілді тағайындау;
Құрылтай жұмыс істемеген кезеңде заң күші бар жарлықтар шығару құқығын беру ұсынылған.
Нәтижесінде заң жобасы бірінші оқылымда мақұлданды.
