Қазақстанда мектеп түлектеріне аттестатты табыстау рәсімі ата-аналарсыз өткізілетін болды деп хабарлайды Stan.kz ақпарат агенттігі.
Бұл туралы ҚР білім және ғылым министрінің орынбасары Шолпан Каринова өзінің Facebook-тегі парақшасында мәлімдеді.
«Жыл сайын бұл іс-шара маусым айының ортасында өткізілетін. Бірақ мектеп бітірушілер үшін қорытынды аттестаттау емтихандары өткізілмейтінін және ҰБТ-ға қашықтан дайындалу қажеттілігін ескере отырып, бұл іс-шараны маусым айының басынды өткізу туралы шешім қабылдадық. Іс-шара аясында салтанатты түрде аттестаттар тапсырылып, 11-сынып түлектері үшін соңғы қоңырау соғылады», - деді вице-министр.
Сөзінше, аттестат тапсыру рәсімі шақырылған қонақтарсыз өтетін көрінеді.
"Іс-шара міндетті түрде мектеп аумағында, ашық ауада, қонақтарсыз, тек бітірушілердің қатысуымен және санитарлық нормаларды сақтай отырып өтуі тиіс. Аттестат тапсыруда әдеттегі мектеп формасында болу ұсынылады", - деп қосты ол.
Бұған дейін премьер-министрдің орынбасары Ералы Тоғжанов мектеп түлектерінің аттестат алу рәсімі маусымда өткізілетіні жайлы айтқан болатын.
"Мектептерде аттестат табыстау мен соңғы қоңырау шарасы 3-4 маусым күндері ашық аспан астында өтеді. Онда адам саны шектеліп, санитарлық нормалар қатаң сақталуы тиіс", - деді Ералы Тоғжанов.
stan.kz