17 қаңтар, 2023
Сыртқы істер министрлігі Украинадағы соғысқа Қазақстан азаматтары қатысқаны туралы құзырлы органдардан ешқандай ақпарат алған жоқ. Бұл туралы СІМ ресми өкілі Айбек Смадияров мәлімдеді, деп хабарлайды Kznews.kz тілшісі.
"Украинаның құзырлы органдарынан Қазақстан азаматтарының Украина аумағындағы қарулы қақтығысқа қатысқаны немесе ұсталғаны туралы ешқандай ақпарат алған жоқпыз. Сонымен бірге, өздеріңіз білетіндей, мұндай әрекеттер Қазақстан Республикасының заңнамасына сәйкес қылмыстық жауапкершілікке тартылады", - деді министрлік өкілі.
Еске салайық, бұған дейін әлеуметтік желіде өзін қазақпын деп таныстырған азаматты украиналық әскерилердің ұстап алғаны түсірілген видео пайда болған еді. Алайда бұл жолы видеодағы тұтқынның қазақстандық екеніне ешқандай дәлел көрсетілмеген.
