Бүгін, 13:08
«Ел құлағы — елу» демекші, қазақ тілінің онлайн курсын әзірлеуге қатысты қоғамда туындаған сауалдарға Тіл саясаты комитеті нүкте қойып, жағдайды майын тамыза түсіндіріп берді. Көптің көкейінде жүрген «құрылыспен айналысатын компания тілді қалай оқытпақ?» деп Kznews.kz сайты сауал жолдаған. Тіл саясаты комитеті бұл сұраққа «Заңның аты — заң» деген ұстаныммен жауап қатты.
Ең алдымен, «сегіз қырлы, бір сырлы» компаниялардың кез келген тендерге қатысуына заң жүзінде шектеу жоқ екен. «Ауруын жасырған өледі» демекші, егер кәсіпкердің ресми тіркелген қызмет түрі (ОКЭД) сәйкес келмесе де, ол мемлекеттік сатып алудан шеттетілмейді. Бұл жерде басты мәселе — «тауықты сойса да, қасапшы сойсын» деген қағиданың сақталуы. Яғни компанияның аты басқа болғанымен, іспен айналысатын мамандарының біліміне білігі сай болуы шарт. Жеңімпаз атанған тарап филология мен педагогиканың жілігін шағып, майын ішкен ғалымдарды, С1 деңгейін растайтын ҚАЗТЕСТ сертификаты бар оқытушыларды және тісқаққан IT мамандарын жұмысқа тартқанын айтып мақтанды. Әр маман өз келісімін электронды қолтаңбамен бекітіп, белді бекем буып отыр дейді-мыс.
Министрлік бұл бәйгенің оңай болмағанын да алға тартады. Бұл конкурс үшінші рет өткізіліп, алғашқы айналымдарда іріктеліп қалған. Соңғы сында бес компания бақ сынап, соның ішінен төрт үміткер сүрінбей өткен. Ал жеңімпазды анықтау кезінде тек «арзанның сорпасы татымас» деген бағаға ғана емес, мамандардың тәжірибесі мен біліктілігіне де баса назар аударылыпты. Порталдың автоматты жүйесі көз жазбай бақылап, ең көп балл жинағанды анықтаған.
«Сақтықта қорлық жоқ» демекші, 2026 жылдың соңына дейін жалғасатын бұл жобаның сапасы комитеттің жіті бақылауында болмақ. Егер мердігер істің көзін таба алмай, міндетін тиісінше атқармаса, айыппұл арқалап, жосықсыз қатысушылардың қара тізіміне еніп, бармақ тістеп қалуы әбден мүмкін. Қысқасы, министрлік «кесіп пішкен» жауабында бәрі заң аясында екенін және тіл тағдырына бей-жай қарамайтынын жеткізді. Ендігі кезек — «іс оңалса, иесіне» демекші, уақыт еншісінде.
Айта кетейік, Ғылым және жоғары білім министрлігінің қазақ тіліндегі онлайн курс дайындау үшін 17,6 миллион теңгені «TEK.A.TEK kz» ЖШС-нің қанжығасына байлап бергенін жазғанбыз. Ал компанияның осыған дейін ХҚКО-ның еденін жуып, зертханалық жабдықтарды жеткізгені, Павлодардың шыбын-шіркейімен күресіп, жылу желілерін жөндегені, тіпті стрит-воркаут алаңдарын салып, базар жұмысын дөңгелеткені анықталған еді.
