Бүгін, 08:51
«Алтыналмас АК» компаниясына қарасты «Пустынное» тау-байыту кешенінде өндірістік оқиға болып, салдарынан кәсіпорын қызметкері көз жұмды, деп хабарлайды kznews.kz.
Компанияның мәліметінше, қайғылы жағдай 23 шілде күні «Пустынное» ТБК аумағында тіркелген. Өндірістік оқиға салдарынан екінші сатыдағы ұсақтау корпусының конвейер машинисі қаза болған.
«Екінші саты ұсақтау корпусының конвейер машинисі қаза болды», – деп хабарлады компанияның баспасөз қызметі.
Қазіргі уақытта оқиғаның нақты себептері мен мән-жайын анықтау үшін уәкілетті мемлекеттік органдар тексеру жұмыстарын жүргізіп жатыр. Тергеу нәтижесі бойынша өндірістік қауіпсіздік талаптарының сақталуына құқықтық баға берілмек.
«Алтыналмас АК» компаниясы марқұмның туған-туыстары мен жақындарына көңіл айтып, оның отбасына заңнамада көзделген барлық қажетті әлеуметтік және материалдық қолдау көрсетілетінін мәлімдеді. Компания оқиғаның себептерін жан-жақты анықтауға және тергеу органдарымен толық ынтымақтастық орнатуға дайын екенін жеткізді.
