Бүгін, 10:40
Қазақстанда Президентке деген сенім деңгейі ауыл мен қала тұрғындары арасында айтарлықтай айырмашылық көрсетпеген, деп хабарлайды kznews.kz.
Қазақстандықтардың Президентке деген сенім деңгейі 86,7 пайызды құрады. Мұндай дерек 2026 жылдың сәуір айында Қазақстан стратегиялық зерттеулер институтының (КИСИ) тапсырысымен жүргізілген қоғамдық пікір сауалнамасында анықталды.
КИСИ мәліметінше, бұл көрсеткіш соңғы бірнеше жыл бойы тұрақты жоғары деңгейде сақталып келеді. Бұл елдегі жаңғыру мен реформалар бағытына қоғамның тұрақты қолдау білдіретінін көрсетеді.
Зерттеу нәтижесінде Президентке деген ең жоғары сенім деңгейі жастар арасында тіркелген – 91,4 пайыз.
«Бұл көрсеткіш жастар сенімінің ерекшелігін айқын көрсетеді. Жас буын мемлекеттік білім гранттары, түрлі бағдарламалар, цифрлық қызметтер мен қолдау тетіктерін белсенді пайдаланады. Сонымен қатар олардың қалыптасу кезеңі елдің қарқынды даму уақытымен тұспа-тұс келді. Бұл факторлар Президентке деген сенім деңгейіне әсер етпей қоймайды», – делінген КИСИ жариялаған мәліметте.
Сауалнама қорытындысына сәйкес, Президентке деген сенім қала тұрғындары арасында – 86,9 пайыз, ауыл халқы арасында – 86,7 пайыз болған. Мамандардың айтуынша, ауылдағы сенім көбіне әлеуметтік бағдарламалар, инфрақұрылымдық жобалар мен мемлекеттік қолдау шараларымен байланысты болса, қала тұрғындарының сенімі жүйелі реформаларды қабылдаумен ұштасады.
Сондай-ақ ерлер мен әйелдер арасында да Президентке деген сенім жоғары деңгейде екені анықталған. Әйелдер арасындағы сенім көрсеткіші ерлерге қарағанда 3,8 пайыздық тармаққа жоғары.
Зерттеу барысында респонденттердің білім деңгейіне қарай айтарлықтай айырмашылық байқалмаған. Президентке деген сенім барлық білім санатында бірдей жоғары деңгейде сақталған.
Мамандардың пікірінше, азаматтардың сатып алу қабілеті артқан сайын Президентке деген сенім де күшейе түседі. Бұл халықтың экономикалық ахуалды оң бағалауы мен мемлекеттік саясатты қолдауы арасында байланыс бар екенін көрсетеді.
«Жалпы алғанда, зерттеу нәтижелері Президентке деген сенімнің тұрақты сипатқа ие екенін көрсетті. Ол білім деңгейіне тәуелді емес, қала мен ауыл арасында айтарлықтай өзгермейді және барлық жас топтарында сақталған. Бұл елдегі даму саясатына жүйелі қолдау бар екенін дәлелдейді», – деп түйіндеді зерттеу авторлары.
Әлеуметтік сауалнама 2026 жылдың 10 сәуірі мен 10 мамыры аралығында жүргізілген. Зерттеуге 8 мың респондент қатысқан. Олардың қатарында 17 облыс пен республикалық маңызы бар Астана, Алматы және Шымкент қалаларының 18 жастан асқан тұрғындары бар.
