Бүгін, 22:07
Президент Қасым-Жомарт Тоқаевтың төрағалығымен Қауіпсіздік Кеңесінің отырысы өтті. Жиында Қазақстанның ғарыш саласының қазіргі жағдайы мен алдағы даму бағыты қаралды, деп хабарлайды kznews.kz.
Отырыста ғарыш инфрақұрылымын жаңғырту, спутниктік байланыс жүйесін күшейту және ғарыш саласының стратегиялық мүмкіндіктерін мемлекет мүддесіне тиімді пайдалану мәселелеріне баса назар аударылды.
Мемлекет басшысы әлемде ғарыш индустриясы түбегейлі өзгеріп жатқанын айтты. Оның сөзінше, бұл сала бұрынғыдай тек ірі мемлекеттердің ғана қолындағы бағыт емес. Қазір жеке компаниялар да спутниктік байланыс, навигация, ғарыштық мониторинг және ғылыми зерттеу салаларында белсенді жұмыс істеп жатыр.
Осыған байланысты Қазақстан да жаңа талаптарға бейімделіп, ғарыш саласындағы мүмкіндіктерін кеңінен пайдалануы қажет.
Жиында Премьер-министрдің орынбасары – Жасанды интеллект және цифрлық даму министрі Жаслан Мәдиев ғарыш деректеріне негізделген қолданбалы шешімдерді енгізу және спутниктік жүйелерді цифрландыру бойынша атқарылып жатқан жұмыстар туралы баяндама жасады.
Президент ғарыш саласын дамыту тек технологиялық емес, ғылыми тұрғыдан да маңызды екенін атап өтті. Әсіресе астрофизика бағытындағы зерттеулерге басымдық беру қажеттігі айтылды. Мемлекет басшысы ұлттық технологиялық және инженерлік әлеуетті арттыруға бағытталған жұмыстардың маңызын ерекше атап өтті.
Сонымен қатар Тоқаев халықаралық серіктестікті нығайту қажеттігіне тоқталды. Ол Ресей Федерациясымен және басқа да шетелдік әріптестермен стратегиялық ынтымақтастықты тереңдетуді тапсырды.
Жиында Байқоңыр қаласы мен оған жақын орналасқан елді мекендер тұрғындарының әлеуметтік-тұрмыстық жағдайын жақсарту мәселесі де көтерілді. Бұл бағыттағы жұмыстардың жүйелі түрде жүргізілуі қажет екені айтылды.
Отырыс қорытындысы бойынша Мемлекет басшысы Үкіметке ғарыш саласын жаңғырту, оның нәтижелерін экономика мен мемлекеттік басқару жүйесінде тиімді қолдану жөнінде нақты тапсырмалар берді.
