Бүгін, 15:22
Шығыс Қазақстан облысында Осинов асуындағы айналма жолға төселген асфальттың қайта сүріліп жатқаны әлеуметтік желіде қызу талқыланды, деп хабарлайды kznews.kz.
Желі қолданушылары жаңа жолдың бірнеше жыл жабық тұрғанын, ал асфальттың айтарлықтай бүлінбегенін айтып, жөндеу жұмыстарының себебіне күмән келтіріп жатыр.
– Осинов асуындағы жаңа жолға асфальт төселгеніне он шақты жыл болды. Ұзақ уақыт бойы жол жабық жатты. Енді келіп асфальтты қайта сүріп тастаған. Оның не қажеті болды? Асфальтта айтарлықтай мәселе байқалмайды, – деп жазды куәгерлердің бірі.
Сонымен қатар тұрғындар көпір маңында құрылыс жұмыстары белсенді жүріп жатқанын, аумаққа шлагбаум мен бақылау бекеті орнатылғанын да атап өтті.
Әлеуметтік желіде тараған видеодан жол бойында арнайы техника жұмыс істеп жатқанын көруге болады. Алайда әзірге жауапты мекемелер аталған жұмыстардың нақты себебі туралы ресми түсініктеме берген жоқ.
