Бүгін, 16:07
Рақымшылық туралы заң жобасын талқылау барысында Мәжіліс депутаты Мұрат Әбенов Ішкі істер министрлігін жол-көлік оқиғасы салдарынан адамдарға ауыр дене жарақатын келтіру фактілерін ауыр қылмыстар санатына жатқызуға шақырды. Осы орайда ол Алматыдағы Әл-Фараби даңғылында болған жол апаты бойынша сот процесін және айыпталушының ұстанымын еске салды, деп хабарлайды kznews.kz.
«Егер мұндай әрекеттерді ауыр қылмыстар қатарына енгізсек, адамдар ойланар еді. Қазір ол кешірім сұрап, жылап жатыр. Бірақ оларды кешіруге болмайды. Өйткені мұндай адамдардың әрекеті адам өліміне әкелуі мүмкін», – деді Әбенов.
Ішкі істер министрінің орынбасары Санжар Әділов Әділет министрлігі жанындағы сарапшылар жол заңнамасын реформалау жұмыстарын бастап кеткенін айтты. Оның сөзінше, Қылмыстық кодекстің 345-бабына өзгерістер енгізіліп, азаматтарды ауыр жарақаттаған жол ережесін бұзушылар ауыр қылмыс жасағандар санатына жатқызылуы мүмкін.
