Маңғыстау облысының әкімі Нұрдәулет Қилыбай некеден тыс туған баласына қатысты пікірін білдірді. Айтуынша, ол заң талаптарына сай алимент төлеп отыр, алайда баласымен тұрақты араласпайды, деп хабарлайды kznews.kz.
Әкім әлеуметтік желіде тараған "сот ДНҚ арқылы баласы екенін мәжбүрлеп танытты" деген ақпаратты жоққа шығарды.
"Бұл менің жеке өмірім. Желіде ақпарат "сот ДНҚ арқылы баласы деп тануды міндеттеді" деп тарады. Бұл шындыққа жанаспайды. "Сот менің өтінішімді қанағаттандырды" деп айтқан дұрыс болады. Себебі 2021 жылы туған баланы ұлым деп тану үшін сотқа өзім жүгіндім. Қазір заңға сәйкес алимент төлеп отырмын", – деді Нұрдәулет Қилыбай.
Сөз соңында өңір басшысы бұл жағдайға өкініш білдірді.
"Жалақымның 20%-ы көлемінде төленеді. Оны бухгалтериядан сұрау керек. Осындай жағдай болды. Өкінемін. Менің бір кездері жасаған қателігім. Уақытты кері қайтара алмаймыз", – деп түйіндеді ол.
