19 мамыр, 2020
Ауданның жаңа әкімі 37 жаста, бұрын Қазақстан президенті әкімшілігінде жұмыс істеген. Қазақ ұлттық аграрлық университетінің ректоры, академик Тілектес Есполовтың кенже баласы
АЛМАТЫ, 19 мамыр – Sputnik. 37 жастағы Бектенбай Есполов Нұр-Сұлтан қаласы "Алматы" ауданының әкімі болып тағайындалды, деп хабарлайды қала әкімдігінің баспасөз қызметі.
"Қызметке тағайындау Қазақстан президенті әкімшілігімен және елорда мәслихаты депутаттарымен келісілді",- делінген әкімдік хабарламасында.
Оқи отырыңыз: Нұр-Сұлтанда әкім қызметінен кетті
Бектенбай Есполов бұрын Қазақстан президенті әкімшілігінің мемлекеттік бақылау және ұйымдастыру-аумақтық жұмыс бөлімінің мемлекеттік инспекторы болып жұмыс істеді.
Мемлекеттік қызметтегі жұмыс өтілі он жылдан асады.
"Бектенбай Есполов – меритократия қағидатына сәйкес кеңсе сарапшысынан Қазақстан президенті протоколы бастығының орынбасарына дейінгі қызмет жолынан өткен тәжірибелі маман", - деп атап өтті қала әкімдігінің баспасөз қызметі.
Айта кетейік, Бектенбай Есполов – Алматыдағы Қазақ ұлттық аграрлық университетінің ректоры Тілектес Есполовтың төртінші баласы.
Тілектес Есполов – ғалым, Қазақстанның еңбек сіңірген қайраткері, 100-ден аса ғылыми еңбектің авторы. 2005 жылы "Парасат" орденімен марапатталған.
Бұған дейін "Алматы" ауданының әкімі қызметін Әділбек Сәрсембаев атқарды. Ол "Қазақстан инжиниринг" ҰК" АҚ басқарма төрағасы болды.
sputniknews.kz
