26 наурыз, 2020
Жаңа ережеге сәйкес, елорданың халықаралық әуежайына басқа елдерден келген барлық жолаушы карантинге жіберіліп, коронавирусқа қарсы тексеріледі
НҰР-СҰЛТАН, 26 наурыз – Sputnik. Нұр-Сұлтанда соңғы төрт күнде басқа елдерден ұшақпен келген тағы 1448 адам карантинге жіберілді. Бұл туралы Нұр-Сұлтан қаласы қоғамдық денсаулық сақтау басқармасының басшысы Сәуле Қисықова мәлімдеді, деп хабарлайды Sputnik Қазақстан тілшісі.
Нұр-Сұлтанда коронавирус жұқтырған төрт адам ауыр хәлде жатыр
"Нұр-Сұлтанда төтенше жағдай жариялануына байланысты Нұр-Сұлтан қаласы халықаралық әуежайына келген барлық азаматты оқшаулау туралы шешім қабылданды. Осы жұмыстың аясында біз 22 наурыздан 25 наурызға дейін халықаралық әуежайға келген барлық 18 рейстегі 1483 жолаушыны оқшауладық", - деді Қисықова брифингте.
Басқарма басшысының айтуынша, олардың әрқайсысына зертханалық зерттеу жүргізілген.
"Осы жолаушылардың үшеуінен індет табылды. Оларды ауруханаға жатқызып, емдеу бойынша жұмыстары жүргізілді. Сондай-ақ жақын қарым-қатынаста болғандар анықталды", - деп толықтырды Сәуле Қисықова.
Қазақстанда коронавирус жұқтырғандар саны 109 адамға жетті. Ең көбі Нұр-Сұлтан қаласында – 61 адам, одан кейін Алматы қаласында – 40 адам.
Қарағанды қаласында – 2, Шымкентте – 2, Алматы облысында – 1, Ақтөбе облысында – 1, Жамбыл облысында – 1, Солтүстік Қазақстан облысында – 1 адам тіркелді.
sputniknews.kz
