Бүгін, 12:46
Қазақстанның Олимпиада чемпионы Михаил Шайдоров 2026 жылға арналған жаңа келісімшартқа қол қойды. Бұл туралы Туризм және спорт вице-министрі Серік Жарасбаев мәлімдеді, деп хабарлайды kznews.kz.
Мамыр айының соңында спортшы мен оның командасы бес ай бойы жалақы алмағанын мәлімдеген еді. Осыдан кейін Спорт министрлігі тараптар жаңартылған және жақсартылған қаржыландыру шарттары бар жаңа келісімшартты келісіп жатқанын айтқан.
Вице-министрдің айтуынша, келісімшартқа қазір ресми түрде қол қойылған.
«Келісімшартқа қатысты көп талқыланып жатқан жағдай бойынша айтарым Михаил оған қол қойды. Барлығы заң аясында өтті. Тараптар өзара келісімге келіп, барлық тармақтарды талқылады. Қол қойылғаннан кейін біз оны іске асыруға қабылдадық. Осы келісімшартқа сәйкес барлық төлемдер жүзеге асырылады», - деді ол.
Ол жақын уақытта министрлік өкілдері спортшымен кездесетінін де айтты.
«Біз оның келесі олимпиадалық циклге, жаңа жарыстарға дайындалуы бойынша барлық мәселелерді бірге талқылаймыз. Сондай-ақ еліміздегі мәнерлеп сырғанауды дамыту бағытындағы ортақ жоспарларды қарастырамыз», - деді Серік Жарасбаев.
5 маусымда Михаил Шайдоров пен оның командасы алдағы маусымға дайындықты жалғастыру үшін АҚШ-қа аттанбақ.
Вице-министрдің айтуынша, Шайдоров Қазақстан спортындағы маңызды тұлғалардың бірі және министрлік оны толық қолдайды.
Сонымен қатар ол спортшының Миланда өткен 2026 жылғы қысқы Олимпиада ойындары жарысында алтын медаль жеңіп алғанын да атап өтті.
