7 тамыз, 2025
Оның айтуынша, бұл мәселе әлеуметтік блок өкілдерімен бірлесіп талқыланып, заң аясында тұрғын үй көмегі ретінде реттелмек. Яғни, коммуналдық төлемдер айтарлықтай өскен жағдайда, табысы төмен отбасыларға қолдау көрсетіледі.
«Азаматтардың кірісі жеткіліксіз болған жағдайда, отбасының жиынтық табысы есепке алынады. Әр аймақта бұл көрсеткіш әртүрлі. Егер төлем сол шектен асып кетсе, артық шығын жергілікті бюджет есебінен өтеледі. Мысалы, кей өңірлерде шекті мөлшер – 10%, ал Астана мен Алматыда бұл көрсеткіш сәл жоғары болуы мүмкін. Қызылордада 5-7% деңгейінде белгіленуі ықтимал. Жалпы, егер коммуналдық төлемдер отбасының табысының 10%-ынан асып кетсе, ол сома жергілікті бюджеттен өтеледі», – деді Бозымбаев.
Вице-премьердің айтуынша, бұл тұрғын үй көмегі болашақта «әлеуметтік әмиян» жүйесіне енгізілмек.
«Әлеуметтік көмек беру кезінде белгілі бір нормативтерді ескереміз. Мәселен, үш адам 800-1000 шаршы метрлік үйде тұрса, көмек әлеуметтік нормалар шеңберінде ғана беріледі. Ал 5-6 адам үш бөлмелі пәтерде тұратын болса, онда төлемнің 100%-ы өтелуі мүмкін. Біз ең алдымен шынымен мұқтаж жандарды қолдауға басымдық береміз», – деп нақтылады ол.
