Қазақстан Республикасының Президенті Қасым-Жомарт Тоқаевтың Жапония астанасы Токиоға жасаған ресми сапары екі ел арасындағы қарым-қатынасты жаңа деңгейге көтерген маңызды саяси оқиға болды. Бұл сапар Қазақстан мен Жапония арасындағы көпжылдық достық пен өзара сенімге негізделген ынтымақтастықты одан әрі тереңдетуге бағытталды, деп хабарлайды kznews.kz.
Мемлекет басшысының Жапонияға жасаған алғашқы ресми сапары Император Нарухитомен кездесуден басталды. Президент көрсетілген қонақжайлық үшін алғысын білдіріп, қазақстандықтардың Жапония халқының тәртібі мен еңбекқорлығын жоғары бағалайтынын атап өтті. Сондай-ақ екі ел арасындағы қатынастар өзара құрмет пен көпжақты ынтымақтастыққа негізделгенін айтты.
Өз кезегінде Император Нарухито бұл сапар Қазақстан мен Жапония арасындағы байланыстың дамуында маңызды кезең болатынын және екіжақты әріптестікті жаңа деңгейге көтеретінін жеткізді.
Сапар аясында Мемлекет басшысы Жапонияның жоғары басшылығымен бірқатар маңызды кездесулер өткізді. Атап айтқанда, Жапония Премьер-министрімен және ресми билік өкілдерімен жүргізілген келіссөздерде сауда-экономикалық байланыстарды кеңейту, инвестициялық серіктестік, өнеркәсіп, энергетика, көлік-логистика, цифрландыру және «жасыл» экономика салаларындағы бірлескен жобалар талқыланды.
Президент Қасым-Жомарт Тоқаев Жапонияны Қазақстанның Азия-Тынық мұхиты аймағындағы басты стратегиялық серіктестерінің бірі ретінде атап өтті. Оның айтуынша, Жапонияның озық технологиясы, инновациялық тәжірибесі мен жоғары басқару мәдениеті Қазақстан үшін аса маңызды. Мемлекет басшысы жапон компанияларын елімізде жүзеге асырылып жатқан ірі инфрақұрылымдық және индустриялық жобаларға белсенді қатысуға шақырды.
Мемлекет басшысы Hitachi Construction Machinery компаниясының президенті Масафуми Сэнзакиді қабылдады. Кездесуде қазақстандық тау-кен кәсіпорындары мен жапондық компания арасындағы ынтымақтастықты кеңейту мүмкіндіктері талқыланды.
Мемлекет басшысы Қазақстанның Hitachi Construction Machinery үшін өңірдегі негізгі серіктес екенін атап өтіп, өзара тиімді байланыстарды тереңдетуге дайын екенін жеткізді. Президент кен орындарының сұранысын ескере отырып, өндірісті локализациялау мен техникаға қызмет көрсету және жөндеу бағыттарын дамытуға басымдық беру маңызды екенін айтты. Сондай-ақ цифрландыру, «жасыл» технологиялар және дербес көлік жүйелері ынтымақтастықтың перспективті салалары ретінде аталды.
Өз кезегінде Масафуми Сэнзаки компания Қазақстанда және жаһандық жобалар аясында жоғары технологиялы, төмен көміртекті әрі қауіпсіз шешімдерді енгізуді мақсат ететінін мәлімдеді.
Кездесулер барысында атом энергетикасы, сирек кездесетін металдар, машина жасау, медицина, білім беру және ғылым салаларындағы ынтымақтастыққа ерекше назар аударылды. Қазақстан тарапы Жапонияның бейбіт атом саласындағы тәжірибесін жоғары бағалап, бұл бағытта ашық әрі ұзақмерзімді серіктестікке дайын екенін білдірді. Сонымен қатар экология мен табиғатты қорғау, климаттың өзгеруіне қарсы күрес мәселелері де келіссөздердің күн тәртібінен тыс қалмады.
Президент Қасым-Жомарт Тоқаев Komatsu компаниясы директорлар кеңесінің төрағасы Хироюки Огаваны қабылдады. Кездесуде Мемлекет басшысы жапон корпорациясын Қазақстанның тау-кен инфрақұрылымын дамытуға зор үлес қосып келе жатқан сенімді серіктес ретінде атап өтті.
Президент Komatsu-дың Астанада техникаларды күрделі жөндеу және қалпына келтіруге арналған өндірістік кешен салу туралы шешімін қолдайтынын білдірді. Өз кезегінде Хироюки Огава Орталық Азияны әлеуеті жоғары стратегиялық нарық деп атап, жаңа кешеннің өңірдегі тау-кен компанияларына жедел әрі қолжетімді сервистік қызмет көрсететін ірі хабқа айналатынын айтты.
Қасым-Жомарт Тоқаев Қазақстан өндірісті локализациялауға, өнеркәсіптік ынтымақтастықты кеңейтуге және озық технологияларды тартуға мүдделі екенін жеткізді. Сондай-ақ кездесу барысында кадр даярлау мәселесіне ерекше назар аударылып, Президент Komatsu компаниясының операторлар, механиктер мен инженерлерге арналған аймақтық оқыту орталығын ашу бастамасын қолдады.
Сондай-ақ Mitsui компаниясы директорлар кеңесінің төрағасы Тацуо Ясунагады, Жапония металл және энергетикалық қауіпсіздік жөніндегі ұйымының (JOGMEC) төрағасы Ичиро Такахаруды, Sumitomo компаниясының президенті Шинго Уэноны қабылдады.
Сапардың маңызды бөлігі инвестициялық бағытқа арналды. Президент жапон бизнес өкілдерімен кездесіп, Қазақстанда инвесторлар үшін жасалған қолайлы жағдайлар, құқықтық кепілдіктер мен экономикалық реформалар туралы жан-жақты мәлімет берді. Мемлекет басшысы Қазақстанның ашық әрі болжамды серіктес екенін атап өтіп, жапон капиталының елімізге тартылуын одан әрі арттыруға мүдделі екенін жеткізді.
Гуманитарлық және мәдени байланыстар да сапар барысында кеңінен сөз болды. Тараптар білім беру бағдарламалары, студенттер алмасу, ғылыми зерттеулер мен мәдени жобаларды дамытуға уағдаласты. Президент Қазақстан жастарының Жапонияда білім алуына, ал жапон студенттерінің Қазақстанды тануына мүмкіндік беретін бірлескен бастамалардың маңызын атап өтті.
Айта кетейік, Мемлекет басшысы Токиодағы бірқатар мәдени және іскерлік нысандарды аралап, Жапонияның даму үлгісімен, қалалық инфрақұрылымымен және технологиялық жетістіктерімен танысты. Бұл сапар екі ел арасындағы өзара түсіністікті нығайтып қана қоймай, ұзақмерзімді серіктестікке нақты мазмұн берді.
Президент Қасым-Жомарт Тоқаев Токио қаласының Төтенше жағдайлар жөніндегі ахуалдық орталығына барды. Бұл орталық азаматтық қорғаныс пен мегаполистегі қауіп-қатердің алдын алуға арналған негізгі құрылым саналады.
Мекеме қаладағы жағдайды тәулік бойы бақылап, төтенше жағдай кезінде мемлекеттік органдардың жұмысын үйлестіреді. Сондай-ақ жер сілкінісі, тайфун, су тасқыны, ірі техногендік апаттар мен лаңкестік әрекеттерге қатысты ақпараттарды жинап, талдайды.
Орталықтың маңызды бағыттарының бірі – бұқаралық ақпарат құралдары мен әлеуметтік желілерде тарайтын жалған мәліметтерге қарсы әрекет ету. Бұл міндетті арнайы бөлімше тәулік бойы атқарады.
Бұдан бөлек, орталық дағдарыс жағдайларын басқару жүйелерін жетілдірумен, азаматтық қорғаныстың өңірлік жоспарларын әзірлеумен, оқу-жаттығулар өткізумен және халықты хабардар етуге арналған ақпараттық жүйелерді дамыту ісімен айналысады.
Қорытындылай келе, Қасым-Жомарт Тоқаевтың Токиоға сапары Қазақстан мен Жапония арасындағы стратегиялық әріптестікті жаңа сапалық деңгейге шығарған маңызды қадам болды. Бұл сапар нәтижесінде қол жеткізілген келісімдер мен уағдаластықтар екі елдің экономикалық дамуына, инновациялық әлеуетін арттыруға және аймақтық тұрақтылықты нығайтуға серпін беретіні сөзсіз.