Бүгін, 10:01
Маңғыстау облысында 7 шілде күні күндіз Ақтаудан шамамен 48 шақырым жерде орналасқан O'Mir курорттық қонақүйі маңында жоғалып кеткен 18 жастағы Азамат Дүйсехановты ауқымды іздестіру жұмыстары жүріп жатыр, деп хабарлайды kznews.kz Lada.kz басылымына сілтеме жасап.
Туыстарының айтуынша, сол күні бозбала достарымен бірге туған күнін атап өткен. Сағат 15:00 шамасында ол теңіз жағасында жоғалып кеткен. Содан бері оның қайда екені туралы ешқандай дерек жоқ.
Қазіргі уақытта іздестіру шараларын ТЖД қызметкерлерімен қатар Азаматтың туған-туыстары, достары мен жақындары жүргізіп жатыр.
Өңірлік ТЖД мәліметінше, іздестіру жұмыстарына 32 қызметкер, оның ішінде жедел-құтқару жасағының 11 маманы, 4 техника, 3 жүзу құралы және 8 ұшқышсыз ұшу аппараты жұмылдырылған.
Сонымен қатар операцияға Әскери-теңіз күштерінің 5 сүңгуірі мен бір техникасы, сондай-ақ ҚР ҰҚК Шеккара қызметінің 5 сүңгуірі мен бір техникасы тартылды.
Іздестіру-құтқару жұмыстарына барлығы 53 адам, 6 техника, 3 жүзу құралы, 10 сүңгуір және 8 ұшқышсыз ұшу аппараты қатысып жатыр.
Құтқарушылардың дерегінше, іздестіру аумағында ауа температурасы +30 °C, су температурасы +22 °C, күн бұлтты, шығыстан соққан желдің жылдамдығы 4 м/с құрайды.
Жоғалған жігіттің туыстары барша жанашыр тұрғындардан іздеу жұмыстарына көмектесуді сұрайды. Әсіресе еріктілердің, дрон операторларының және қайық иелерінің көмегі аса қажет.
Сондай-ақ отбасы 7 шілдеде курорттық қонақүй маңында болған немесе іздеу жұмыстарына септігін тигізетін қандай да бір ақпараты бар жандардан хабарласуды өтінеді.
Көмек көрсете алатын немесе Азамат Дүйсехановтың болуы мүмкін жері туралы ақпараты бар жандардың келесі нөмірлерге хабарласуы сұралады: +7 (778) 967-61-23 және +7 (775) 985-57-54.
