Маңғыстау облысында әскери оқу-жаттығу кезінде қаза тапқан әскери қызметшілердің алдын ала тізімі тарады, деп хабарлайды kznews.kz.
Басылым таратқан мәлімет бойынша, қаза тапқандар қатарында:
Сержан Аяпберген;
Әсет Жанабай;
Алмас Көбенов;
О. Мұхтарұлы;
Жеңіс Темірғалиев;
Азамат Мадихан;
Ақылбек Төлеген;
Өмірбек Өмірзақ.
Алдын ала ақпаратқа сәйкес, қайғылы жағдай 24 қыркүйекте Каспий теңізінің жағалауында Әскери-теңіз күштерінің оқу-жаттығуы кезінде болған. Оқу-жауынгерлік міндеттер орындалып жатқан сәтте ауа райы күрт өзгеріп, жел күшейген. Соның салдарынан әскери қызметшілердің бір бөлігін теңіз ағыны алып кеткен.
Қазіргі таңда сегіз әскери қызметшінің қаза болғаны туралы ақпарат тарады. Өзге әскери қызметшілерді іздестіру және құтқару жұмыстары жалғасып жатыр.
Оқиғаның нақты себептері мен мән-жайын анықтау үшін Үкіметтік комиссия құрылды. Оның құрамына бірқатар министрліктің басшылары, Маңғыстау облысының әкімі, Бас әскери прокурор және Шекара қызметінің өкілдері кірді.
Сонымен қатар қайғылы жағдайға байланысты қылмыстық іс қозғалып, тергеу басталған. Оқиға орнында құқық қорғау және төтенше жағдайлар қызметтерінің мамандары жұмыс істеп жатыр. Қажетті сот сараптамалары тағайындалған.
Әзірге қаза тапқан әскери қызметшілердің аты-жөні бойынша ресми тізім жарияланған жоқ. Сондықтан тараған ақпараттың түпкілікті деректерін тиісті мемлекеттік органдардың мәліметтерімен нақтылау қажет.
Үкіметтік комиссия оқиғаның барлық мән-жайын анықтап, әскери оқу-жаттығу кезінде төтенше жағдайға әкелген себептерді зерделемек.