Мәдениет және ақпарат вице-министрі Евгений Кочетов Сенатта ЛГБТ насихатына қатысты заң талаптарын бұзғандарға қандай жаза қолданылатынын түсіндірді, деп хабарлайды kznews.kz.
Оның айтуынша, ЛГБТ-ге жатқаны үшін ешкім жауапкершілікке тартылмайды. Жаза тек «Құқыққа қайшы контенттің таралуының алдын алу туралы» заң аясында қарастырылған.
"Интернеттегі ЛГБТ насихаты құқыққа қайшы контентке жатқызылған, сондықтан жауапкершілік «айна принципі» бойынша қолданылады. Егер бұл бірінші құқық бұзушылық болса, айыппұл 20 АЕК (2025 жылы 78 640 теңге) мөлшерінде белгіленеді. Ал бір жыл ішінде қайталанса, айыппұл көлемі ұлғайтылуы немесе 10 тәулікке дейін әкімшілік қамақ қолданылуы мүмкін", - деді вице-министр.
Кочетов бұл норманың мәлімдемелік сипатта болатынын атап өтті. Яғни, құқық бұзушылықтар автоматты түрде анықталмайды. Тек азаматтардан өтініш түскен жағдайда ғана, мысалы eOtinish порталы арқылы, контентке сараптама жүргізіледі.
Еске салсақ, бүгін Сенат депутаттары ЛГБТ насихатына тыйым салатын заң жобасын мақұлдады.
