Бүгін, 09:41
Танымал блогер әрі аралас жекпе-жек спортшысы Махмуд Хикматовты интерпол іздеуге кірісті. Бұл туралы Қаржылық мониторинг агенттігі хабарлады.
ҚМА мәліметінше, Хикматов заңсыз интернет-казиноларды жарнамалаумен айналысып, оларды әлеуметтік желілерде насихаттау үшін басқа блогерлерді тартқан.
Тергеу нұсқасына сәйкес, ол интернет-казинолардың жарнамасын таратуға 35-тен астам танымал инфлюенсерді тартқан. Олардың қатарында жақында Вьетнамнан Қазақстанға экстрадицияланған Қайсар Қамза да бар.
Құзырлы орган мәлімдегендей, Хикматов блогерлерді таңдаған кезде олардың әлеуметтік желідегі аудиториясының саны ғана емес, жазылушылардың жасы, географиясы, демографиялық құрамы мен жарияланымдардың қамту көрсеткіші де ескерілген.
Тергеу дерегіне сәйкес, инфлюенсерлер интернет-казиноларға апаратын сілтемелерді жариялап, сол арқылы келген пайдаланушылар үшін сыйақы алған.
Хикматовқа қатысты сот қамауда ұстау түріндегі бұлтартпау шарасына санкция берген.
