Бүгін, 15:00
Алматы облысының Кеген ауданында полиция қызметкерінің өліміне қатысты қылмыстық іс тергеліп жатыр. Күйдірілген мәйіттің табылуы қоғамда үлкен резонанс тудырды, деп хабарлайды kznews.kz.
Алдын ала мәліметтерге сәйкес, 23 маусым күні таулы аймақтан адамның өртенген мәйіті табылғаны туралы хабар полицияға түскен. Оқиға орнына жедел тергеу тобы жіберіліп, марқұмның жеке басы анықталған. Кейін оның Алматы қаласындағы Әуезов аудандық полиция басқармасында қызмет еткен 37 жастағы Аслан Альсеров екені белгілі болды.
Алматы облыстық Полиция департаментінің мәліметінше, аталған дерек бойынша қылмыстық іс қозғалып, жан-жақты тергеу басталған. Жедел-іздестіру шаралары барысында күдіктілер анықталып, ұсталған. Олардың қатарында марқұмның жұбайы мен ұлы да бар. Қазіргі уақытта күдіктілер уақытша ұстау изоляторына қамалып, тергеу амалдары жүргізілуде.
Құқық қорғау органдары оқиғаның барлық мән-жайын анықтау үшін қажетті сараптамалар мен тергеу әрекеттерін жалғастырып жатқанын мәлімдеді. Әзірге қылмыстың себептері мен нақты жағдайлары жарияланған жоқ.
Марқұм Аслан Альсеров құқық қорғау саласында қызмет етіп жүрген тәжірибелі маман болған. Оның отбасы көпшілікке үлгілі жанұя ретінде танылған. Ерлі-зайыптылар 15 жылдан астам уақыт бірге өмір сүріп, жеті бала тәрбиелеп өсірген. Бұған дейін олардың отбасы туралы түрлі телесюжеттер түсіріліп, бұқаралық ақпарат құралдарында мақалалар жарияланған болатын.
Қазір қоғам назарын аударған бұл іс бойынша тергеу жалғасып жатыр. Құзырлы органдар оқиғаның толық мән-жайы анықталғаннан кейін қосымша ақпарат берілетінін хабарлады.
