Бүгін, 13:50
Олардың айтуынша, өздерін полицей ретінде таныстырған азаматтар әлеуметтік желідегі жарияланымдарды өшіруді сұраған.
Каспий теңізіндегі әскери жаттығу кезінде сарбаздардың қаза болуына байланысты әлеуметтік желі қолданушылары полиция қызметкерлері атынан хабарласқан белгісіз адамдар туралы мәлімдеді, деп хабарлайды kznews.kz
Threads желісінің кейбір қолданушылары полиция қызметкерлері үйлеріне келгенін де жазған. Алайда Ішкі істер министрлігі бұл ақпаратты жоққа шығарды.
ІІМ вице-министрі Санжар Әділовтің айтуынша, полиция қызметкерлері азаматтарға әлеуметтік желідегі жазбаларын жою туралы талаппен қоңырау шалмаған.
«Ешқандай қоңырауды полиция қызметкерлері жасаған жоқ», – деді Санжар Әділов.
Министрлік өкілінің сөзінше, Каспийдегі қайғылы оқиғадан кейін құқық қорғау органдары күшейтілген режимде жұмыс істеген. Полиция қызметкерлері Маңғыстау облысында ғана емес, еліміздің басқа өңірлерінде де қоғамдық тәртіпті қамтамасыз етуге тартылған.
Осылайша ІІМ әлеуметтік желілерде тараған полицияның азаматтарға хабарласып, жазбаларды өшіруді талап еткені туралы мәліметтердің шындыққа сәйкес келмейтінін мәлімдеді.
