4 наурыз, 2026
Израиль Қорғаныс министрі Исраэль Кац Иранның кез келген жаңа басшысы Израиль армиясының «сөзсіз жою нысанасына» айналатынын мәлімдеді, деп хабарлайды kznews.kz.
«Израильді жою жоспарын жалғастыру, АҚШ-қа, еркін әлемге және өңір елдеріне қауіп төндіру, сондай-ақ иран халқын қудалау үшін иран режимі тағайындайтын кез келген басшы сөзсіз жойылу нысанасына айналады. Оның аты кім екені немесе қайда жасырынғаны маңызды емес», — деп жазды Кац Х әлеуметтік желісінде.
Израиль Қорғаныс министрі премьер-министр Биньямин Нетаньяхумен бірге әскерилерге осы тапсырманы орындауға дайындалу және барлық қажетті шараларды қабылдау жөнінде нұсқау бергенін айтты.
Бұған дейін БАҚ дереккөздерге сілтеме жасап, Иранның Сарапшылар ассамблеясы Ислам революциясы сақшылар корпусының қысымымен Иран Ислам Республикасының Жоғарғы көшбасшысы Аятолла Сейед Әли Хаменеидің ұлы Моджтаба Хаменеиді елдің келесі жоғарғы жетекшісі етіп таңдағанын хабарлаған болатын.
Еске салайық, 28 ақпанда АҚШ пен Израиль Иранға қарсы ауқымды әскери операция бастады. Тель-Авив билігі соққылардың мақсаты Тегеранның ядролық қаруға қол жеткізуіне жол бермеу екенін мәлімдеді. АҚШ президенті Дональд Трамп өз кезегінде Иранның әскери-теңіз флотын және қорғаныс өнеркәсібін жою ниетін білдіріп, ел азаматтарын режимді құлатуға шақырды.
БАҚ мәліметінше, зымырандар тек әскери нысандарға ғана емес, сонымен қатар Ислам Республикасының өзіндегі және өңірдің басқа елдеріндегі азаматтық инфрақұрылымға да тиіп жатыр. Тегеран жауап ретінде Израиль аумағына және Таяу Шығыстағы америкалық базаларға соққы жасауда.
Бұған дейін демократ-сенатор Ричард Блюменталь америкалық министрлердің заң шығарушылармен жабық кездесуінен кейін АҚШ-тың Иранда құрлықтағы операция жүргізу ықтималдығы бар екенін айтқан еді.
