25 желтоқсан, 2018
Үкімет үйінде Премьер-министр Бақытжан Сағынтаев елімізде қоғамдық тәртіпті және азаматтардың қауіпсіздігін қамтамасыз ету, құқықбұзушылықтарға «нөлдік төзімділік» мәдениетін қалыптастыру мәселелері жөнінде кеңес өткізді.
Кеңеске селектор режимде министрлер, өңірлердің әкімдері, сондай-ақ Ішкі істер министрлігінің және полицияның аумақтық департаменттерінің басшылық құрамы қатысты.
Ішкі істер министрі Қалмұханбет Қасымов еліміздегі қылмыстық жағдай, ұрлықтарға қарсы қабылданып жатқан іс-қимыл шаралары, тұрмыстық зорлық-зомбылықтың және кәмелет жасына толмағандар арасында қылмыстың алдын алу, сонымен қатар қоғамдық тәртіпті сақтау және жол қауіпсіздігін қамтамасыз ету мәселелері туралы баяндады.
Жиында Президенттің «Қазақстандықтардың әл-ауқатының өсуі: табыс пен тұрмыс сапасын арттыру» атты Қазақстан халқына Жолдауында белгіленген міндеттерді және Қазақстан Республикасының 2019-2021 жылдарға арналған Ішкі істер органдарын жаңғырту жөніндегі Жол картасын жүзеге асыру бойынша шаралар талқыланды.
Бұдан өзге, құқықбұзушылықтардың алдын алу, қылмыспен күрес және қоғамдық тәртіпті сақтау бойынша қабылданып жатқан шаралар, халыққа көрсетілетін мемлекеттік қызметтер сапасын арттыру, тұрғындарды тіркеу, әкімшілік және қылмыстық-процессуалдық қызметтерді цифрландыру, жеке құрам арасында тәртіп пен заңдылықты нығайту бойынша комиссия қызметінің мәселелері жөнінде өңірлер әкімдерінің, полиция департаменттері басшыларының есептері тыңдалды.
Кеңес барысында учаскелік полиция инспекторларының рөлін арттыруға, тұрғын үймен жапсарлас учаскелік полиция пункттерін салуға, мектеп инспекторларының институтын одан ары дамытуға ерекше көңіл бөлінді.
Айхан ШӘРІП
