20 қыркүйек, 2025
Әйелдің айтуынша, қаза болған баласын сол күні 11-сыныпта оқитын бес оқушы мәдениет үйінің артына апарып, аяусыз соққыға жыққан. Жасөспірім айқайлап тоқтатуды өтінгенімен, олар әрекеттерін доғармаған. Тіпті дүкенге жіберіп, қайта келген соң тағы да ұрып-соққан. Салдарынан 10-сынып оқушысы жүрек тұсынан соққы алып, көз жұмды.
Марқұмның анасы баласына әлімжеттік мектеп ішінде күнделікті жалғасқанын, ақша талап етіп, түрлі заттар алдырғанын айтады. Ол сондай-ақ күдікті бес жасөспірімнің үшеуі ғана қамауда отырғанын, ал қалған екеуінің ештеңе болмағандай мектепке барып жүргеніне наразы екенін жеткізді.
Ал Жамбыл облыстық полиция департаменті бұл дерекке қатысты түсініктеме жасады.
«Шу ауданындағы оқиға бойынша жан-жақты тергеу жүргізілуде. Үш күдікті қамауға алынды, ал екі жасөспірім сот шешімімен үй қамағына жіберілді. Тергеу барысы полиция департаменті басшылығының қатаң бақылауында», – делінген ресми хабарламада.
