Бүгін, 10:21
Атырауда 23 жастағы Яна Легкодимованы өлтіргені үшін өмір бойына сотталған Алтынбек Қатимов пен Ризуан Хайржанов әлі күнге дейін тергеу изоляторында отыр. Бұл туралы жергілікті "Ақ Жайық" басылымы хабарлады.
Атырау облысы бойынша Қылмыстық-атқару жүйесі департаментінің мәліметінше, сотталғандар тиісті колонияға әлі жіберілмеген. Қазіргі уақытта олар өңірдегі тергеу изоляторында қамауда отыр.
Ведомство өкілдерінің айтуынша, мұндай санаттағы сотталғандарды колонияға жеткізу үшін Ұлттық ұлан тарапынан арнайы қарауыл бөлінуі қажет. Осыған байланысты тиісті өтініш жолданған.
Алайда оларды нақты қашан колонияға этаппен жөнелту жоспарланып отырғаны әзірге белгісіз.
Еске салайық, бұл қылмыс 2024 жылдың 18 қазанында Атырауда орын алған. Тергеу барысында 23 жастағы Яна Легкодимованың қатыгездікпен өлтірілгені анықталып, кінәлілерге өмір бойына бас бостандығынан айыру жазасы тағайындалған.
