Бүгін, 16:21
Алматыда есірткіні жасырын орындар арқылы таратты деген күдікпен мектеп оқушысы ұсталды, деп хабарлайды kznews.kz.
Полиция қызметкерлері таксимен келе жатқан үш кәмелетке толмаған қызды тексеру барысында олардың бірінен өсімдік тектес зат салынған бірнеше ондаған түйіншек пен алдын ала мәлімет бойынша синтетикалық есірткіге ұқсас заттарды тәркілеген.
Тергеудің бастапқы деректеріне сәйкес, күдікке ілінген жасөспірім тыйым салынған заттарды қала аумағындағы арнайы жасырын орындарға қалдырып отырғанын мойындаған.
Қазіргі уақытта құқық қорғау органдары мектеп оқушысын заңсыз есірткі айналымына кімнің тартқанын анықтап жатыр. Сондай-ақ, оның жанында болған тағы екі кәмелетке толмаған қыздың бұл іске қандай да бір қатысы бар-жоғы тексерілуде.
Полиция оқиғаның барлық мән-жайын анықтауға бағытталған тергеу амалдары жүргізіліп жатқанын хабарлады. Тергеу нәтижесі бойынша күдіктілердің әрекетіне құқықтық баға берілетін болады.
