Үкімет 2026 жылғы 1 қаңтардан бастап Мемлекеттік әлеуметтік сақтандыру қорынан тағайындалатын әлеуметтік төлемдердің мөлшерін арттырады, деп хабарлайды kznews.kz.
Тиісті қаулыға Премьер-министр Олжас Бектенов қол қойды.
"Мемлекеттік әлеуметтік сақтандыру қорынан тағайындалған еңбекке қабілеттіліктен айырылу және асыраушысынан айырылу жағдайлары бойынша төленетін әлеуметтік төлемдердің мөлшерлерін 2026 жылғы 1 қаңтардан бастап алатын әлеуметтік төлемдердің мөлшерінен 10 пайызға арттыру жүргізілсін", – делінген Үкімет қаулысында.
Сонымен қатар, осы күннен бастап келесі көрсеткіштер ұлғаяды:
- ең төменгі жалақы мөлшері – 85 000 теңге;
- мемлекеттік базалық зейнетақы төлемінің ең төменгі мөлшері – 35 596 теңге;
- зейнетақының ең төменгі мөлшері – 69 049 теңге;
- айлық есептік көрсеткіш – 4 325 теңге;
- күнкөріс минимумы – 50 851 теңге.
Қазан айында Мәжіліс депутаттары ең төменгі жалақы мөлшерін 110 мың теңгеге дейін арттыруды ұсынған болатын, алайда Үкімет бұл норманы қолдамады және ол заңға енгізілмеді.
