Бүгін, 08:37
Қазақстанның танымал әншісі Димаш Құдайберген өзі білім алған Ақтөбедегі №32 мектеп-гимназияға арнайы барып, ұстаздарымен кездесті. Өнер иесі балалық шағы өткен білім ордасына деген сағынышын білдіріп, әсерлі сәттермен бөлісті, деп хабарлайды kznews.kz.
Әнші кездесуден кейін әлеуметтік желідегі парақшасында мектеп пен мұғалімдердің адам өміріндегі ерекше орны туралы жазба жариялады.
«Мектеп – балалық шақтың ең жарқын естеліктері сақталған мекен. Ал ұстаздар – сол кезеңнің бағыт-бағдарын айқындаған жандар. Бүгін өзім оқыған мектепке барып, білім мен тәрбие берген мұғалімдеріммен жүздестім. Уақыт өтеді, адам есейеді, бірақ мектепке деген сағыныш пен ұстаздарға деген құрмет ешқашан жоғалмайды», – деп жазды әнші.
Димаштың айтуынша, алғашқы ұстаздардың еңбегі мен берген тәлімі адам өмірінде әрдайым маңызды орын алады. Сондықтан ол ұстаздарымен кездесуді ерекше әсерге толы сәт ретінде бағалаған.
Айта кетейік, бұған дейін әнші жанкүйерлеріне тағы бір жаңалығын жеткізген болатын. Оның сөзінше, жақын уақытта Ақтөбе қаласында жаңа бейнебаян түсіру жоспарланып отыр. Бұл жаңалық өнерсүйер қауымның қызығушылығын тудырып, жаңа туындыны асыға күтуге себеп болды.
