Бүгін, 17:26
«Әділет» партиясы Саяси кеңесінің мүшесі Бөріхан Нұрмұхамедов партияның электораты мен алдағы саяси мақсаттары туралы пікір білдірді, деп хабарлайды kznews.kz.
Оның айтуынша, партияның негізгі электораты – қазіргі таңда оның қатарына қосылған азаматтар. Бөріхан Нұрмұхамедов бұл адамдар алдағы сайлауларда «Әділет» партиясына дауыс береді деп есептейді.
Сондай-ақ ол Қазақстандағы сайлаушылар саны бірнеше саяси партияның қызметіне жеткілікті екенін айтты. Оның сөзінше, елде дауыс беру құқығына ие шамамен 12 миллион азамат бар. Соның ішінде сайлауға орта есеппен 7 миллионға жуық адам қатысады.
Нұрмұхамедовтың пікірінше, Әділетті Қазақстан құру идеясын және Президент Қасым-Жомарт Тоқаевтың бастамаларын қолдайтын барлық азаматтар міндетті түрде Amanat партиясының мүшесі емес. Сондықтан мұндай көзқарастағы азаматтардың өзге саяси күштерді де қолдауы табиғи құбылыс саналады.
Сонымен бірге ол партиялардың электоратына қатысты дәстүрлі саяси талдау тәсілдері бүгінгі күні өзектілігін жоғалтып келе жатқанын айтты.
Сөз соңында Бөріхан Нұрмұхамедов «Әділет» партиясының басты міндеттерінің бірі қоғамдағы әділетсіздік мәселелерін азайту екенін атап өтті.
– Жекелеген азаматтар немесе қоғам топтары жиі көтеретін әділетсіздік көріністерін азайту үшін жұмыс істейтін боламыз, – деді ол.
