Бүгін, 12:18
Жамбыл облысының Тұрар Рысқұлов ауданында болған атыс салдарынан бір адам қаза тапты. Қайғылы оқиға 1 тамызға қараған түні, шамамен сағат 03:00-де Луговое ауылында тіркелген, деп хабарлайды kznews.kz.
Марқұмның туыстарының айтуынша, қылмысқа аудан аумағында әрекет етеді деген күдікке ілінген қылмыстық топ мүшелерінің қатысы болуы мүмкін. Олардың сөзінше, күдікті ретінде қарастырылып отырған азаматтардың жасы шамамен 22-де.
Жақындары көз жұмған азаматқа бұған дейін бірнеше мәрте қоқан-лоқы жасалғанын мәлімдеп отыр. Осыған байланысты олар қылмыстың барлық мән-жайын жан-жақты әрі әділ тергеуді, сондай-ақ кінәлілердің заң алдында тиісті жауапкершілікке тартылуын талап етуде.
Сонымен қатар марқұмның отбасы Мемлекет басшысына үндеу жолдап, аталған қылмыстық істі жеке бақылауына алуды сұраған.
Белгілі болғандай, қаза тапқан азаматтың артында жұбайы, бір ұлы мен бірнеше қызы қалған. Сондай-ақ оның қарт ата-анасы жалғыз ұлынан айырылып, ауыр қайғыға душар болған.
