Бүгін, 09:53
Әлеуметтік желілерде Лёля Берг атымен танымал алматылық Элеонора балалық шағында әкесінің тарапынан жыныстық зорлық көргенін мәлімдеп, қылмыстық істің қайта тергелуіне қол жеткізуге тырысып жатқанын айтты, деп хабарлайды kznews.kz.
Қоғамда қызу талқыланған оқиғаға оның әкесімен болған әңгімесінің видеосы себеп болды. Видеода Элеонора өткен оқиғалардың өзінің өмірі мен психологиялық жағдайына ауыр әсер еткенін жеткізеді. Ал әкесі айтылған айыптауларды мойындамай, оларды жоққа шығарады.
Блогердің сөзінше, зорлық әрекеттері оған алты мен тоғыз жас аралығында жасалған. Ол ұзақ уақыт бойы бұл туралы ешкімге айтпағанын, себебі қорқып жүргенін айтты. Элеонораның айтуынша, әкесі бұл жағдай жария болса, жақындарына зиян келтіретінін айтып қорқытқан.
«Ол бұл туралы білгендердің бәрін өлтіремін деп қорқытатын. Кейін өзіне де бірдеңе істейтінін айтатын. Мен кішкентай бала болғандықтан, соған сеніп, қатты қорықтым. Сондықтан осы уақытқа дейін үндемедім. Қазір мен 23 жастамын және бұл жүкпен өмір сүру маған өте ауыр», – деді Элеонора.
Қыздың айтуынша, бірнеше жыл бұрын ол құқық қорғау органдарына жүгінгенімен, дәлелдердің жеткіліксіздігіне байланысты іс алға жылжымаған. Соған қарамастан, қазіргі уақытта тергеу қайта жанданған.
Элеонора қазір заңдық рәсімдерден өтіп жатқанын және тергеу аясында түрлі сараптамалар мен тергеу әрекеттеріне қатысып жүргенін хабарлады. Оның мәліметінше, құқық қорғау органдары істің барлық мән-жайын қайта қарастыруда.
Материал жарияланған кезде құқық қорғау органдары тарапынан да, айыпталған тараптан да ресми түсініктеме берілген жоқ.
