Бұған дейін тергеу оқиғаны “абайсызда адам өліміне әкеп соққан ауыр дене жарақатын салу” (ҚР ҚК 106-бабы, 3-бөлігі) бойынша жүргізген болатын. Алайда қайта өткізілген сот-медициналық сараптама әйелдің өлімі кездейсоқ болмағанын дәлелдеп, іс “Адам өлтіру” (ҚР ҚК 99-бабы) бабына ауыстырылды.
Қайғылы жағдай маусым айында болған. Айзат ауыр соққыдан кейін ес-түссіз күйде табылып, оны күйеуі ауруханаға жеткізген. Алайда дәрігерлердің айтуынша, әйел көп қан жоғалтудан және ауыр жарақаттардан жарты сағаттан соң көз жұмған.
Бастапқы тергеу кезінде полицейлер “қасақана ниет болмаған, себебі күйеуі өзі жедел жәрдем шақырған” деген нұсқаны ұстанған. Бірақ кейінгі сараптама бұл тұжырымды жоққа шығарды.
Мамандардың қорытындысы бойынша, марқұмның денесінде көптеген көгерулер, сынықтар және жыртылған жаралар анықталған. Барлық жарақаттар доғал затпен бірнеше рет соққы беруден пайда болған. Сонымен қатар “дене жерге сүйретілген” деген болжам расталмады.
Айзаттың анасы қызының ауыр халде, ес-түссіз күйінде ауруханаға жеткізілгенін айтты.
“Қызымды бірден әкелгенде, мүмкін аман қалар ма еді. Бірақ оны ес-түссіз күйінде ғана жеткізді. Сонда да бәрін кездейсоқ жарақат деп көрсеткісі келді”, – дейді марқұмның анасы.
Оқиға қоғам назарын аударған соң, отбасы алғашқы сараптаманың қорытындысымен келіспей, эксгумация жасауға шешім қабылдады. Марқұмның денесі қайта қазылып, Алматыда тәуелсіз сараптама жүргізілді.
Қазір тергеу органдары істі қайта қарап жатыр. Күдікті ретінде әйелдің күйеуі тергелуде. Тергеу барысы облыстық прокуратураның ерекше бақылауына алынған.