Бүгін, 14:34
Атырау облысы Жангелдин ауылында бір отбасының төрт мүшесінің өліміне қатысты күдікке ілінген 29 жастағы Сұлтан Сәрсемалиев екі айға қамауға алынды, деп хабарлайды kznews.kz.
Атырау қалалық мамандандырылған тергеу сотының шешімімен күдіктіге қатысты екі ай мерзімге қамауға алу түріндегі бұлтартпау шарасы санкцияланған.
«Ақ Жайық» басылымының мәліметінше, күдікті тергеу изоляторына жеткізіліп, аса ауыр қылмыс жасады деп айыпталғандарға арналған арнайы камераға орналастырылған.
Тергеу деректеріне сәйкес, ол Атырау облысындағы бір отбасының төрт мүшесін өлтірді деген күдікке ілінген. Қаза тапқан ерлі-зайыптылардың мәйіттері өз үйлерінің ауласындағы сарайға көмілген. Ал олардың ұлы мен қызы күдікті бұрын жалдап тұрған Геолог ықшамауданындағы үйдің ауласынан табылған.
Құқық қорғау органдарының мәліметінше, Сұлтан Сәрсемалиев бұған дейін Индонезияда ұсталып, кейін Қазақстанға жеткізілген. Оның жанынан марқұмдарға тиесілі жеке куәліктер, банк карталары және ұялы телефон табылған.
Қазіргі уақытта іс бойынша сотқа дейінгі тергеу амалдары жалғасып жатыр. Тергеушілер оқиғаның барлық мән-жайын анықтап жатыр.
