Бүгін, 10:53
Астана мектептерінің бірінде педагогтың оқушыға физикалық күш көрсеткені анықталды. Оқиғаға қатысты қалалық білім басқармасы түсініктеме беріп, мектеп басшылығының жауапкершілікке тартылғанын мәлімдеді, деп хабарлайды kznews.kz.
Бұл жағдай әлеуметтік желілерде тараған бейнежазба арқылы белгілі болды. Кадрларда мұғалімнің оқушыға күш қолданып, оған дөрекі сөздер айтқаны көрінеді.
Білім басқармасының мәліметінше, жүргізілген қызметтік тексеру нәтижесінде аталған факт расталған.
"Педагог Қазақстан Республикасы Еңбек кодексінің тиісті бабы негізінде жұмыстан босатылды. Сонымен қатар тәртіптік шаралар қабылданып, мектеп директоры мен оның орынбасарлары жауапкершілікке тартылды", – деп хабарлады ведомство.
Қалалық білім басқармасы бұл жағдайдың бақылауда екенін атап өтті.
