Бүгін, 11:20
Астанада базардағы тандырханада газ жарылды: үш адам зардап шекті, деп хабарлайды kznews.kz.
Астананың Байқоңыр ауданындағы Ш. Жиенқұлова көшесінде орналасқан базар аумағындағы екіқабатты әкімшілік ғимаратта газ-ауа қоспасы жарылып, үш адам зардап шеккен.
Алдын ала мәлімет бойынша, жарылысқа көлемі 50 литрлік композиттік газ баллонының герметикалығының бұзылуы салдарынан жиналған газ-ауа қоспасының тұтануы себеп болған.
"Оқиға ғимараттың бірінші қабатында орналасқан тандыр самса әзірленетін бөлмеде тіркелген. Жарылыс салдарынан төбе жабындысының бір бөлігі мен есік ойығы опырылып түсті", - делінген ТЖМ хабарламасында.
Оқиға орнына Төтенше жағдайлар министрлігінің бөлімшелері жедел жетіп, барлау жұмыстарын жүргізді. Құтқарушылар үш зардап шеккен адамды анықтап, олардың барлығын қажетті медициналық көмек көрсету үшін ауруханаға жеткізді.
Қазіргі уақытта оқиғаның нақты мән-жайы мен себептері анықталып жатыр.
