9 сәуір, 2025
Мәжіліс депутаты Асхат Аймағамбетов анимациялық студияларға салық жеңілдігін беруді ұсынды.
- Қазақша мультфильмдер аз — ал салық көп. Бүгінде балалардың көбі басқа тілдегі TikTok пен Netflix ғана көреді. Мемлекеттік тілде контент аз. Неге? Біздің анимациялық студиялар әр кадр үшін ҚҚС төлейді. Қазақша мультфильм шығару — қымбат. Оңтүстік Корея, Польша, Франция — өз анимациясын қорғайды. Бізге де сол қажет, - деді ол палатаның жалпы отырысында.
Сондай-ақ, казиноларға салықты аямай көтеру керектігін айтты.
- Казиноларға салықты батыл көтерейік! Мұнда ешқандай дау жоқ. 20%, 30%, 50% — көтеруге болады. Өйткені әрбір ұтылған ставка — бір отбасының үміті.
Бұл — бизнес емес. Бұл — үмітті жұтатын индустрия. Құрметті әріптестер, біздің ұсынып отырғанымыз — жеңілдік емес, әділеттілік. Салық жүйесі мұқтажға демеу болуы тиіс. Смартфон — кітаптан арзан болмауы керек. Энергетикалық сусын — судан арзан болмауы керек. Осы ұсыныстарды қолдайық, - деді депутат.
Айта кетейік, Салық кодексінің жаңа редакциясы қабылданса, ҚҚС салынатын айналымның төменгі шегі 40 млн теңге болуы мүмкін.
