17 сәуір, 2023
Ақтөбеде жүргізуші оқушыны автокөлікпен қағып, оқиға орнынан қашып кетті, деп хабарлады kznews.kz сайты.
Полиция қызметкерлерінің мәліметінше, 14 сәуірде сағат 22:40 шамасында Әбілқайыр хан даңғылы мен Пацаев көшесінің қиылысында Ваз-2114 автокөлігі бағдаршамның тыйым салу сигналынан өтіп, кәмелетке толмаған жаяу жүргіншіні қағып өтіп, жол-көлік оқиғасы болған жерден қашып кеткен. Салдарынан 17 жастағы жасөспірім ауруханаға жеткізілді.
Полиция қызметкерлері іздеу іс-шараларын жүргізу барысында автокөлікті Әбілқайыр хан даңғылындағы көпқабатты үйдің ауласынан әйнегі, бампері, капоты зақымданған күйінде тапты.
Автокөлік арнайы автотұраққа қойылды. Сондай-ақ жасөспірімді қағып кеткен ер адам жүргізуші куәлігі жоқ 18 жастағы жас жігіт болып шықты.
ҚР ҚК-нің 345-бабы 2-бөлігіне сәйкес сотқа дейінгі тергеу жұмыстары жүргізіліп жатыр. Жүргізуші 2 жылға дейін бас бостандығынан айырылуы мүмкін.
