3 сәуір, 2023
Ақтөбеде полиция мүгедекке қысым жасап, қайыр сұратқан ерлі-зайыптыны анықтады.
Бұл туралы ІІМ Ұйымдасқан қылмысқа қарсы күрес департаментінің басшысы Қанат Нұрмағамбетов айтты.
Биыл ақпанда ерлі-зайыпты 46 жастағы арбаға таңылған ер адамды қорқытып, зорлық-зомбылық жасап, Шымкенттен Ақтөбеге қайыр сұрауға мәжбүрлеп алып келген.
- Күн сайын таңертеңнен кешке дейін мүгедек базарлар аумағында және жұмада мешіттердің жанында күніне 5-6 мың теңге жинаған. Күдіктілер барлық кірісті өздері иемденген, - деді Қанат Нұрмағамбетов ІІМ-де өткен брифингте.
Бұл факті негізінде Қылмыстық кодекстің 128-бабы 1-бөлігі бойынша («Адам саудасы») сотқа дейінгі тергеу басталды.
