Бүгін, 10:27
Ақтөбеде толассыз жауған жаңбыр салдарынан қала көшелерін, аулаларды және бірқатар нысандарды су басты. Қатты нөсерден кейін тұрғындардың жаяу жүруі қиындап, көліктер үлкен шалшықтар арқылы әрең қозғалды, деп хабарлайды kznews.kz.
Әлеуметтік желілерде тараған видеолардан көшелердің өзенге айналғанын, тұрғын үйлердің аулалары мен сауда орталықтарының аумақтарын су басқанын көруге болады.
Қала әкімдігінің мәліметінше, соңғы үш апта ішінде Ақтөбеде бір жылға жуық жауын-шашын мөлшері түскен. Осыған байланысты қолданыстағы жүйе судың мұндай көлемін қабылдауға қауқарсыз болып отыр.
Қазіргі уақытта коммуналдық қызмет мамандары күшейтілген режимде жұмыс істеуде. Арнайы техника су басқан аумақтардан суды сорып шығарып жатыр. Дегенмен жауын-шашынның көптігі салдарынан су тасқынының салдарын толық жою оңай болмай отыр.
Мамандар тұрғындарға ауа райы болжамын қадағалап, қажетсіз жағдайда көшеге шықпауға кеңес береді.
