Қазақстанда тұрмыстық зорлық-зомбылық қаупін дер кезінде анықтауға көмектесетін "Электронды қорғау аймағы" пилоттық жобасын іске қосу ұсынылды. Мұндай бастаманы Құрылтай депутаты Айжан Аймағанова көтерді. Ол тиісті сауалын ішкі істер министрі Ержан Сәденовке жолдады, деп хабарлайды kznews.kz
Аймағанова мысал ретінде қоғамда үлкен резонанс тудырған екі кісі өлімін келтірді. 13 шілдеде Абай облысында 20 жастағы Дильназ Жұмағұлова алған көптеген пышақ жарақатынан көз жұмды. Қыркүйек айында Астанада бұрынғы күйеуі екі баланың анасы Жазира Адауованы өлтіріп кетті.
"Осыған байланысты маңызды сұрақ туындайды: қолданыстағы қорғау тетіктері жасалған зорлық-зомбылыққа әрекет етіп қана қоймай, қауіпті алдын ала анықтауға және оның алдын алуға қаншалықты мүмкіндік береді?" - деді депутат.
Нені өзгерту ұсынылып отыр?
Аймағанова Ішкі істер министрлігіне жекелеген өңірлерде "Электронды қорғау аймағы" пилоттық жобасын әзірлеуді және сынақтан өткізуді ұсынды. Оның айтуынша, бұл үшін жаңа қымбат ақпараттық жүйе құрудың қажеті жоқ, өйткені Қазақстанда профилактикалық есеп пен электронды бақылау тетіктері қалыптасқан.
Сонымен қатар депутат қауіп туралы белгі түскен кезде полиция іс-қимылының бірыңғай міндетті алгоритмін бекітуді ұсынды.
Тағы бір бастама - әрбір осындай белгі мен ол бойынша қабылданған шараларды автоматты түрде цифрлық тіркеу. Бұл кімнің, қашан және қандай әрекет жасағанын қадағалауға мүмкіндік береді.
"Заң мен Тәртіп" қағидатын іске асыру үшін қауіпті жағдайларды дер кезінде анықтау және алдын алу мақсатында қолданыстағы құқықтық және цифрлық мүмкіндіктерді пайдалану қажет", - деп атап өтті Аймағанова.
Депутат мұндай қорғау тетіктері басқа елдерде, мысалы, Францияда қолданылатынын да айтып өтті.
Естеріңізге сала кетейік: осы жылдың 13 шілдесінде Абай облысының Бородулиха ауылында көптеген пышақ жарақаты бар 20 жастағы Дильназ Жұмағұлованың денесі табылды. Тергеу мен сот қызды жанжал барысында бұрынғы жігіті өлтіргенін анықтады. 13 қазанда Семей соты ер адамды 14 жылға бас бостандығынан айырып, марқұмның отбасына моральдық шығын ретінде 20 миллион теңге өтемақы төлеуді міндеттеді. Үкім жарияланған сәтте заңды күшіне енген жоқ болатын.
2026 жылдың 22 қыркүйегінде кешке Астанада тұрғын үй терезелерінің астында бір әйел пышақ жарақатын алып, соның салдарынан көз жұмды. Күдікті ізі суымай ұсталды. Қайғылы оқиғаға ден қою кезіндегі салғырттық үшін полицияның бірнеше басшысы мен қызметкері қызметінен босатылып, ұсталды.