Бүгін, 12:09
Respublica партиясының кезекті съезінде партия төрағасы Айдарбек Ходжаназаровтың өкілеттік мерзімін тағы үш жылға ұзарту туралы шешім қабылданды, деп хабарлайды kznews.kz.
Партияның тең төрағасы Сырымбек Таудың айтуынша, жарғыға сәйкес төраға үш жыл мерзімге сайланады, ал Айдарбек Ходжаназаровтың қазіргі өкілеттік мерзімі 29 шілдеде аяқталады.
Осыған байланысты ол съезд делегаттарына партия басшысының өкілеттігін ұзарту жөнінде ұсыныс жасады.
«Сайлау алдында, қиын-қыстау уақытта партияның алдында төрағаны ауыстыру не қалдыру мәселесі тұр. Менің жеке ұсынысым – партия төрағасы Айдарбек Ходжаназаров мырзаның өкілеттігін ұзартуды қолдауларыңызды сұраймын», – деді Сырымбек Тау.
Ұсыныс ашық дауысқа салынып, съезге қатысқан 592 делегаттың барлығы бірауыздан қолдау білдірді. Нәтижесінде Айдарбек Ходжаназаров Respublica партиясының төрағасы қызметін алдағы үш жыл бойы жалғастыратын болды.
