Бүгін, 17:04
Қазақстан тумасы Санжар Әбішев Лондонда Сент-Джеймс ауданы әкімі (мэрі) сайлауында жеңіске жетті, деп хабарлайды kznews.kz.
Ол Ұлыбританияның Консервативтік партиясынан сайлауға түсіп, шамамен 2,3 мың дауыс ішінен қарсыласынан 350 дауысқа артық жинаған.
Бұл туралы ақпаратты қазақстандық кәсіпкер әрі Kusto Group компаниясының тең құрылтайшысы Қанат Көпбаев әлеуметтік желілерде жариялады. Ол жеңіс туралы хабар мен дауыс санау сәтінен видео да бөліскен. Көпбаевтың айтуынша, Санжар — оның досының ұлы, ол мектеп жасында Ұлыбританияға қоныс аударған. Кейбір деректерде бұл бизнесмен Азат Әбішев болуы мүмкін екені айтылады.
«Қазақ отбасынан шыққан, Ұлыбритания элитасында туыстары мен байланысы жоқ жас жігіт білім, тәртіп және көп жылдық еңбек арқылы Лондонның беделді ауданында мэр болды. Бұл оның жолының тек бастамасы деп сенемін», - деп жазды Көпбаев.
LinkedIn деректеріне сәйкес, Санжар Әбішев Ұлыбританиядағы Malvern College колледжін және жоғары оқу орнын бітірген. Ол әр жылдары маркетинг саласында жұмыс істеген, ал 2016 жылдан бастап Blue Swallow Group атты жеке агенттігін дамытып келеді. Бұл компания ірі брендтермен жұмыс істейді.
Сонымен қатар ол қайырымдылық және әлеуметтік жобалармен айналысады. 2015 жылы әлеуметтік бастамаларды қолдайтын ұйым құрған. 2022 жылдан бастап саясатқа белсенді араласа бастаған, ал өткен жылы Сент-Джеймс ауданындағы Консервативтік партия бөлімшесін басқарған.
Әлеуметтік желілердегі мәліметтерге қарағанда, ол аудан өміріне белсенді қатысып, тұрғындармен жиі кездесулер өткізіп, қоғамдық жұмыстарға араласқан.
Сент-Джеймс — Лондонның ең беделді және қымбат аудандарының бірі. Ол Букингем сарайы, Вестминстер және Мэйфэр ауданына жақын орналасқан. Мұнда элиталық тұрғын үйлер, жабық джентльмен клубтары, қымбат мейрамханалар мен тарихи ғимараттар шоғырланған. Бұл аймақ дәстүрлі түрде британ элитасының, дипломаттардың, кәсіпкерлердің және аристократия өкілдерінің тұратын жері ретінде белгілі.
